كنت فاقدة الحياة تماماً بعد الانفصال وضياع حقي.
لكن لما جيت المجلس القومي للمرأة عشان أقدم شكوى، عرفوني على ورش تعليم الحرف اليدوية.
قلت لهم: معقولة في السن ده هقدر؟
ولما قدرت، حسيت إن في حياة تانية بدأت، وإن عندي موهبة أقدر أبدأ بيها من جديد.
وبدأت أستعيد الأمل والثقة من تاني.

أنتم عارفين عملتوا فينا إيه؟
أنا كنت يائسة تماماً، ما ليش حيلة، ما ليش حد، كل حاجة راحت مني.
لكن رجعتولي الحميمية والعيلة والألفة، وحسيت إن عندي فرصة أبدأ من جديد.
وأتمنى يبقى في استمرارية عشان أطور أكتر وأعمل مشروعي الخاص

أول حرفة اتعلمتها كانت خياطة الشنط.
كانت أول مرة أقعد على مكنة خياطة وكنت خايفة، أصل عمري ما اشتغلت أو عملت حاجة بنفسي قبل كده.
لكن لما شفت الناس مبسوطة من شغلي، حسيت إني ممكن أعمل حاجة. وقلت: ليه ما يكونش عندي مشروع صغير؟

من سنتين حصلتلي أزمة نفسية كبيرة.
ما كنتش عارفة أتخطى الموضوع لوحدي، كنت خلاص قربت النهاية، وكنت بقول: أنا هاموت من الوجع.
بس لا، بقيت أحسن، وإن شاء الله هابقى أحسن تاني، لأن أنا حاسة إني بعمل حاجة بحبها

أنا فخورة إن ولادي بقوا يقولوا: ماما فنانة.
ده الفخر اللي كنت بدور عليه.

نفسي لما حد يشتري منتجاتي يشوفني أنا في قلب المنتج.
يشوفوا روحي فيه، يشوفوا تعبي ومجهودي، عشان أنا حقيقي بعمل الحاجة بحب.

نفسي يبقى كل أسمائنا مكتوبة على الحرف،
عشان الناس تعرف إننا إحنا اللي اشتغلناها.

لما أتعب وأسهر وأفك الغرزة وأعيد من الأول،
وبعدين أشوف الشنطة خلصت بشكل حلو والعميلة فرحت بيها،
بحس إن تعبي له طعم مختلف.

لو استسلمت وقلت أنا اتظلمت، يبقى أنا اللي ظلمت نفسي.
عشان كده أنا اللي بقرر أصحى بدري كل يوم وأشتغل فى الحرف.

المدربة رسمت لنا وردة صغيرة وقالت لنا نعمل زيها.
كنا خايفين ومش عارفين إزاي نخيط ولا إزاي نبدأ الغرزة.
لكن مع التدريب، الوردة بقت جنينة.
إحنا نقدر نقلب أي حاجة بسيطة لحاجة حلوة.

كنت بعمل كل حاجة في الليل: أكل، غسيل، أي شغل في البيت، عشان أقدر أروح المشغل بدري من الساعة سبعة ونص.
بتحدى نفسي عشان بيتي ما يتهملش ولا شغلي يضيع.
نفسي؟ أنا نفسي الشغل ده يدوم طول السنة.

ظروفنا كلها متشابهة، وإحنا مش عايزين نكون عالة على حد.
كلنا مجتهدات وبنسعى نرفع من نفسنا ونقف على رجلينا.

اللي بيميزنا إننا متعاونات وبنشيل مع بعض وبنشجع بعض دايماً.
اللي بتغلط بنساعدها، واللي بتعرف حاجة بتعلمها للباقي.
وده اللي بيخلي الشغل يطلع أحسن.

إحنا عايزين نبان قدام ولادنا إن إحنا مش متكلين على حد، عشان العيل ما يتكلش على حد.
فأنا بشتغل قدامهم، بزرع فيهم إنه لازم يشتغل ويبني نفسه بنفسه.
وبقول لابني: بص يا ماما، أنا بشتغل عشان انت تتعلم وتبقى أحسن مني.
إن شاء الله يبقوا أحسن مني.

أنا محامية في الأساس، لكن الظروف والمواصلات عندنا صعبة جداً، وكنت حاسة إني مخنوقة عشان مش عارفة أشتغل أو أحقق دخل للبيت.
لما عرفت إن في تدريب تطريز، جيت فوراً.
ولما خلصت أول قطعة بإيدي، حسيت إني ليا كيان جديد، كأني رجعت أتنفس